ಹೂ ಮತ್ತು ಹುಡುಗಿ

ನಿಂತಿದ್ದಾಳೆ ಹೊತ್ತೇರುವ ಮೊದಲೇ
ಹೂ ಮಾರುವ ಹುಡುಗಿ
ಇಬ್ಬನಿಯ ಮುಸುಕಿನಲ್ಲಿ
ಹಗಲುಗನಸುಗಳ ದಂಡೆ ಹಿಡಿದ ಕೈ
ಇದ್ದಂತೆಯೇ ಇರುತ್ತದೆ
– ಪೋಸ್ಟ್‌ ಕಂಬದಂತೆ

ಏರುತ್ತಿರುವ ಸೂರ್ಯ
ಬಾಡುತ್ತಿರುವ ಹೂಗಳು
ಅದರಂತೆ ಹುಡುಗಿ ಕೂಡಾ
ಒಮ್ಮಿಂದೊಮ್ಮಲೇ ಸ್ಥಾಯಿ ಭಾವಗಳು
ಸಂಚಾರಿ ಭಾವಗಳಾಗುತ್ತವೆ-
– ಬಸ್ಸಿನ ಹಾರ್ನ್‌ ಶಬ್ದಕ್ಕೆ;
ಉತ್ಸಾಹ ಚಡಪಡಿಕೆಯಾಗುತ್ತದೆ
ಆ ಕ್ಷಣದಲ್ಲಿ ಹುಡುಗಿ ತಲ್ಲೀನಳಾಗುತ್ತಾಳೆ
ರಂಗದ ಮೇಲಿನ ನಟಿಯಂತೆ
ತನ್ನ ಪಾತ್ರದಲ್ಲಿ
ಇಳಿಯುವ ಹತ್ತುವ ನೂರಾರು ಕಣ್ಗಳ ದೃಷ್ಟಿ
ಕೆಂಪು ಕೆಂಪು ಹುಡುಗಿಯ ಮೊಗ
ಮರುಕ್ಷಣ –
ಸ್ತಬ್ದವಾದ ಆ ತಾಣ
ಮುಂದೋಡಿದ ಬಸ್ಸು
ಮೇಲೇರಿದ ಧೂಳಿನಲ್ಲಿ ಮುಚ್ಚಿದ ಹುಡುಗಿ

ಪುಟ್ಟ ತಮ್ಮ ಪೀಪಿ ತರಲು ಹೇಳಿದ ನೆನಪು
ಹುಡುಗಿ ಕುಕ್ಕರಿಸುತ್ತಾಳೆ
ಕತೆ ಹೇಳುತ್ತದೆ
ಬಾಡಿದ ಹೂವಿನ ದಂಡೆ
ಸೋತ ಕೈಗಳಲ್ಲಿ ಜೋತಾಡುತ್ತಾ

* ವನಜಾ ಕೊಳಗಿ